Кошмо Штаттардын президенти Дональд Трамптын айтымында, Украина лидери Владимир Зеленский орус-украин согушун токтотуу боюнча Вашингтон сунуштаган планга "кол коюуга даяр эмес", алтургай документ менен толук тааныша элек.
Бул тууралуу Трамп Кеннеди борборунун сыйлык тапшыруу аземине катышар алдында журналисттерге билдиргенин The Hill басылмасы жазды. Президент кайсы документ жөнүндө айтып жатканы белгисиз. Анткени АКШ сунуштаган пландын алгачкы версиясы кийин бир топ өзгөргөнү маалым болгон.
"Чынын айтсам, бир аз нааразы болдум. Президент Зеленский АКШнын сунушу менен да тааныша элек. Бир нече саат мурда тааныша элек болчу. Анын командасына план жакты, бирок анын өзүнө жаккан жок", — деди Трамп.
Америка президентинин айтымында, Москва "Украинаны толук басып алгысы келет" , анткен менен тынчтык пландын шарттарына макул.
6-декабрда Зеленский Трамптын өкүлдөрү Стив Уиткофф жана Жаред Кушнер менен "узак жана мазмундуу сүйлөшүү өткөргөнүн билдирген.
Анын айтымында, тараптар "кан төгүүнү токтотууга жана Орусиянын үчүнчү ирет кол салуу коркунучун алдын ала турган негизги маселелерди" талкуулаган.
"Алардын 24/7 режиминде бирге иштөөгө даярдыгы үчүн ыраазымын. Америкалык өкүлдөр украин позицияларынын негизги принциптерин билишет. Сүйлөшүү татаал болсо да конструктивдүү болду. Иш уланууда", — деди Зеленский.
Ал ошондой эле Коопсуздук кеңешинин катчысы Рустем Умеровдон жана Башкы штабдын жетекчиси Андрей Гнатовдон Майами шаарында өткөн сүйлөшүүлөрдүн жыйынтыгы күтүп жатканын кошумчалады.
2-декабрда Кушнер менен Уиткофф Москвада орус президенти Владимир Путин менен жолугушкан. Кремль анда бир катар маселелер боюнча мунаса табылбаганын билдирген.
Маалымат каражаттарына жарыялангандай, Американын тынчтык планынын биринчи вариантында Донбасстын толугу менен Орусияга өтүшү, Украина күчтөрүнүн учурда көзөмөлдөп турган аймактардан чыгышы сунушталган.
Женевадагы сүйлөшүүлөрдөн кийин The New York Times өз булактарына таянып жазгандай, бул версиядан аймак боюнча жоболор алынып салынган.
Украин президенти Владимир Зеленский АКШнын чабарманы Стив Уиткофф жана Трамптын күйөө баласы Жаред Кушнер менен телефон аркылуу “так жана конструктивдүү” маектешкенин билдирди. Америкалык эки өкүл 2-декабрда Орусия лидери Владимир Путин менен жолугуп, АКШнын тынчтык планын талкуулашкан.
“Биз көптөгөн аспектилерге көңүл буруп, кан төгүүнү токтотууга кепилдик бере турган жана Орусиянын үчүнчү жолу басып кирүү жана өз убадаларын аткарбай коюу коркунучун жоюуга жардам бере турган маанилүү нерселерди ыкчам талкууладык”, - деди Зеленский.
Сүйлөшүүгө учурда АКШда жүргөн Украинанын Улуттук коопсуздук жана коргоо кеңешинин катчысы Рустем Умеров жана Башкы штабдын башчысы Андрей Гнатов да катышты.
Axios басылмасы булактарына таянып жазгандай, сүйлөшүү эки саатка созулуп, анда тараптар аймактык маселелерди жана коопсуздук кепилдигин сүйлөшкөн. Басылманын маектешинин айтымында, аймактык маселелер тууралуу талкуу “татаал” болгон. Орусия буга чейинкидей эле өзүнүн көзөмөлүндө болгон Донбасс аймагынан Украинанын күчтөрүн чыгарып кетүүнү талап кылууда, бирок АКШ “бул көйгөйдү чечүүгө жаңы сунуш ойлоп табууга аракет кылып жатат”.
Коопсуздук кепилдиги боюнча маселеде тараптар кыйла алдыга жылып, макулдашууга жакындаганын басылманын маектеши билдирген.
Ал ошондой эле Уиткофф менен Кушнер эки тарапка тиешелүү маалыматтарды чогултуп, макулдашууну шарттай турган талаптарга макул кылдыруу үчүн Путинге да, Зеленскийге да басым көрсөткөнүн айтып берген.
АКШ президентинин Украина боюнча атайын өкүлү Кит Келлог ишембиде Украинадагы согушту токтотуу боюнча макулдашууга “аз калганын” жана чечим Донбасстын жана Запорожье атомдук электр станциясынын келечеги тууралуу маселеден көз каранды экенин айткан.
Владимир Путин 2-декабрда Москвада АКШнын президенти Дональд Трамптын атайын чабарманы Стив Уиткофф жана күйөө баласы Жаред Кушнер баштаган америкалык делегация менен жолуккан. Жергиликтүү басылмалар Орусиянын Украинага каршы согушун токтотуу тууралуу сүйлөшүүлөр дээрлик беш саатка созулганын, Уиткофф жолугушуудан кийин АКШнын Москвадагы элчилигине жөнөп кеткенин жазышкан.
7-декабрга караган түнү Орусия Украинага 241 дрон жана беш баллистикалык ракета менен сокку урганын украин Куралдуу күчтөрү билдирди.
Маалыматка караганда, анын ичинен 175 дрон, төрт ракета жок кылынды.
"14 локацияга 65 дрон тийгени катталды", – деп жазылган маалыматта.
Бутага Полтава облусундагы Кременчуг шаары да алынып, инфратүзүмдүк жайларга зыян келтирилгенин калаанын мэри Виталий Малецкий билдирди.
Курмандыктар жана жараат алгандар тууралуу маалымат жок. Шаардын көптөгөн райондорунда суу, жарык, жылуулук берүү үзгүлтүккө учураганы белгилүү болду.
Кийинчерээк облус башчысы Владимир Когут Кременчуг районунда энергетикалык бир нече ишканага сокку урулганын маалымдады.
Чернигов облусунун Новгород-Северский шаарында Орусиянын дрон чабуулунан бир киши каза тапты. Калаада бир нече жерде өрт тутанды.
Согуш шартында тараптардын маалыматтарын ыкчам текшерүү мүмкүн эмес.
Орусиянын агрессиясына жооп иретинде Украина орус армиясын камсыздаган ишканаларды бутага алып келет. Ишемби түнү украин дрондору Рязандагы мунайды кайра иштетүүчү заводго сокку урганы кабарланган. Шаар жана облус тургундары бул түнү жарылуунун добушун угушканын айтып беришти. Рязан облусунун губернатору соккунун айынан өрт чыкканын, жабырлануучулар жок экенин билдирди.
Рязан заводу жылына 17 миллион тоннадан көп мунайды иштетет. Бул жайда бензин, дизел жана реактивдүү май чыгарылат. Мындан тышкары завод жылына 840 миң тоннадай авиациялык керосин чыгарат жана орус армиясынын аба-космостук күчтөрүн камсыздайт.
ASTRA Телеграм каналы билдиргендей, Рязан заводуна 2025-жылдан бери ушуну менен тогузунчу ирет сокку урулду.
Орусиянын Коргоо министрлиги бул түнү 116 украиналык дрон жок кылынганын же колго түшүрүлгөнүн билдирди. Анын көбү Рязан облусунун аймагында. Мындан тышкары 20дан ашык дрон Воронеж, Брянск жана Белгород облустарынын аймагында катталган.
Воронеж облусунун губернатору Александр Гусев Телеграмга “бир катар муниципалдык мекемелер зыян тартканын” билдирди.
ASTRA жазган маалыматка караганда, кеминде бир украиналык дрон Волгоград облусундагы “Альфаойл” мунай базасына да сокку урган.
